Statement
January 8, 2010
“Only through militant struggle can the best in the youth emerge.” – Jose Maria Sison
Ginapaabot sa League of Filipino Students- Southern Mindanao Region ang taas kamao nga pagsaludo alang kang kaubang Kemberly Jul Luna.
Ginaingon nga lisod ang kinabuhi sa usa ka aktibista. Daghang pasakit. Anaa ang mga higayon nga dili makauli ug balay, makasab-an sa ginikanan, mga gabii nga walay tulugay, magutman ug syempre ang walay puas nga paglangoy sa lapad nga ihap sa masa aron mag-Arouse, Organize ug Mobilize. Apan dili mabayaran ang kalipay sa mga kauban sa matag kampanya nga madaugon. Mao kini ang kinabuhi sa mga aktibista. Mao kini ang kinabuhi sa LFS.
Dako nga sakripisyo ang pagwakli sa pangkaugalingong interes, ang paggawas sa eskwelahan aron magserbisyo sa maguuma sa kabukiran, labi na sa mga naggikan sa hut-ong peti-burgesya. Sa esensya, batakang responsibilidad sa kabatan-onan ang paglubog ug pagsalmot sa pakigbisog sa batakang masa.
Ginasaluduhan ug ginaila sa mga kaubanan sa LFS-SMR ang personal nga desisyon ni Kaubang Kimay nga ihalad ang iyahang kinabuhi pinaagi sa pagsalmot sa armadong pakigbisog sa kabukiran aron i-asdang ang nasudnong demokratikong interes ug katungod sa katawhan.
Ang nagapadayon nga pagpahimulos, pagyatak sa tawhanong katungod, pasismo sa estado ug Imperyalistang agresyon ang nagapugos sa katawhan partikular sa kabatan-onan nga musalmot sa tanang porma ug pamaagi sa pakigbisog alang sa tinuod nga kabag-ohan ug kalingkawasan.
Sa pagkahagba sa lawas ni Kaubang Kimay nga gibangagan sa bala sa kaaway, nilanog sa kakusog ang singgit sa katawhan. Nasuko sa kasamtangang kahimtang. Nasuko sa nagharing hut-ong nga padayon na nagapahimulos sa katawhang nilupigan.
Mabuhay si Kaubang Kemberly Jul Luna!
Mabuhay ang tanang kabataang martir!
I-asdang ang Nasudnong Demokratikong Pakigbisog sa Katawhan!
Alang sa tinuod na hustisya ug kalingkawasan,
Karlos Manlupig
LFS-SMR, Regional Spokesperson
